《降魔的》成搜尋榜首！Google年度熱門搜尋出爐，結果證明香港人真係好鐘意睇劇～

想知道2017年喺香港最興啲乜？睇下哩份榜單就可以清楚知道啦！十個關鍵字入面，竟然有7個係電視劇集，證明香港人真係好鐘意睇電視劇～

Google喺12月13號公佈年度熱門搜尋榜單（Year in Search），哩份榜單紀錄過去一年港人喺唔同範疇之中最關注嘅人／事。喺「熱爆本地頭條」入面，排第一位就係前排勁Hit嘅TVB劇集《降魔的》～

《降魔的》喺10月30號先播出第一集，短短兩個月內成為2017年港人Search得最多嘅關鍵字，哩套劇有幾紅真係唔洗再講啦～

第二位同埋第四位都係港人最愛嘅Apple產品iPhone 8同埋iPhone X！Apple嘅產品基本上每年都會進入榜單裡面，例如2016年份榜單嘅第4位都係iPhone7～

第三位都係TVB贏盡口埤嘅電視劇《不懂撒嬌的女人》，哩套劇仲係2017上半年最高收視嘅TVB劇集，仲好記得嗰排個個都會唱：「陪著你走，一生一世也不分～」

第五位係港味勁濃嘅網劇《反黑》，成套劇入面有好多老戲骨＋好戲之人：陳小春、陳國坤、陳惠敏、李璨琛等等～頭三日喺國內已經有過億點擊！

第六位係《使徒行者2》，三年前《使徒行者》大獲好評，今年播出嘅《使徒行者2》就係前傳～因為林峯、佘詩曼都已經離巢，今次加入好多新角色！觀眾對哩套劇都好受落，成為榜單其中一位都唔意外呀～

第七位係熱爆韓劇《鬼怪-孤單又燦爛的鬼神》，應該好多女仔（包括小編）都一定有Search過嚟睇～2016年由《太陽的後裔》成為唯一韓劇，今年就係《鬼怪》入榜，實至名歸呀～

第八位係製作費高達2億人民幣嘅《射鵰英雄傳2017》！自開播以來話題不斷，口碑亦都唔錯～當中由李一桐飾演嘅黃蓉受到網民高度關注，仲有網民封佢為「最有仙氣黃蓉」添～

第九位係《超時空男臣》，輕鬆搞笑嘅風格成功打入市場！

第十位係易鑫，係股王「騰訊」系嘅新股，受到港人熱捧，超額認購咗成559倍！

韓劇方面，都係由《鬼怪-孤單又燦爛的鬼神》成為榜首，《藍海傳說》、《大力女子都奉順》都係上榜名單之一～

潮語方面，上榜嘅有「KOL」、「LOL」、「係愛呀哈利」等等，睇嚟大家都唔係好明哩啲潮語係點解～

Text Source：Girls Editorial
Source：Google Trends
Photo Source：Google、TVB