《尋秦記》電影版最快係2017年底開拍！唔知大家又支唔支持原班人馬翻拍神劇？

2001年神劇之作《尋秦記》絕對係代表咗一代人心中嘅經典神劇，近日古天樂（古仔）就已經表示會係電影中延續返項少龍嘅角色，完全引發咗一眾劇迷一齊集體追憶，電影版就有望最快係2017年底開拍，但至於係咪原班人馬拍似乎仲係未知之數～

作為《尋秦記》其中一個女主角之一宣萱近日就憑《不懂撒嬌的女人》人氣急升，早前就被問到會唔會有邊個舊拍檔最想合作，宣萱就表示最想同古仔再次合作拍劇，不過就覺得成事機會唔大！

而古仔都大方回應話都想同宣萱合作，其實拍電影、電視都好，都要遇到好劇本先得！

再被問到會否返嚟拍劇時，古仔諗咗陣就話：「拍劇其實一直都有諗，我覺得有好嘅劇本，我都會考慮，但係最緊要時間配合到啦，其實而家都密麻麻啦！如果時間配合到劇本好，我都會考慮！」

當年古仔拍《尋秦記》飾演項少龍一角已經成為咗大家心中無人可以超越到嘅經典角色，即刻後來再有翻拍此劇，但網民都覺得「古天樂之後再無項少龍」～

古仔之前現身係香港國際影展開幕時，就已經宣佈將會係電影版《尋秦記》中繼續扮演項少龍，真係為一眾等咗咁多年嘅粉絲帶嚟好消息～其實可以係電影中延續返項少龍嘅角色，的確已經圓咗唔少粉絲嘅夢～

《尋秦記》電影版就已經落實最快會係2017年底開拍，不過好多粉絲最想知嘅係會唔會原班人馬翻拍神劇！當古仔被問到《尋秦記》電影版會唔會搵返宣萱做女主角時，古仔就話：「哩個要問返導演喇！我只係演員嚟」

雖然女主角就仲未確定到，但宣萱都話可唔以可以拍電影版嘅《尋秦記》都要睇緣分，始終投資方已交咗俾內地，話事權就係佢地手上，不過如果有人搵佢，宣萱都好樂意去傾合作～

至於另一經典角色飾演嬴政嘅林峯都係大家期待佢回歸嘅角色之一，不過暫時就仲未聽到風聲話會搵林峯參與，結果都仍然未知！

其實好多網民都希望電影版嘅《尋秦記》可以原班人馬上陣，認為咁先可以拍出最原汁原味嘅版本，電影版嘅《尋秦記》嘅角色到而家都仲未公布，不過照咁睇嚟，會唔會原班人馬上陣嘅機會都仍然係一半一半！

唔知大家又支唔支持原班人馬拍《尋秦記》呢？如果真係原班人馬上陣，絕對可以一齊重拾返各位嘅兒時回憶呀！