陳展鵬位位緋聞女友都是女神級，最終情定單文柔！「入TVB 就是為了每年嘅港姐選舉，終於等到佢！」

適逢2月14號情人節，TVB推出一小時特別版的清談節目《諸朋戀友》，請來陳展鵬與單文柔幾對夫婦和情侶分享相識經過，並分享交往期間的甜蜜往事！

TVB清談節目《諸朋戀友》請來3對藝人夫妻，包括陳展鵬及單文柔、黎諾懿及太太李潔瑩、徐榮及太太Kathy，以及情侶陸浩明與女友Ayan~現年45歲的陳展鵬與單文柔於2018年結婚，育有一個囡囡「小豬比」，兩人結婚三年多，一直相當恩愛，不時在社交平台分享一家三口的溫馨合照！

港姐決賽當晚邂逅~

在《諸朋戀友》節目中，兩人憶述當年的相識經過！單文柔於2016年參選香港小姐競選入行，而陳展鵬在決賽當晚擔任港姐星級評判，兩人正正是在港姐決賽當晚邂逅~陳展鵬更笑指︰「入嚟TVB做，緊係盼望每年的港姐啦，終於個年就等到佢啦~」

單文柔透露老公追求自己的過程，表示︰「佢叫我同佢影相，影完之後佢同我講︰『你喺IG send返張相畀我啦』」，更害羞表示當時覺得陳展鵬好紅！兩人事隔半年後再傾偈，並在公司見面時交換電話~陳展鵬知道單文柔熱愛 Fashion，於是請她幫自己揀衫﹑襯衫，「多咗傾偈之後就約見面~」

曾傳出不少緋聞，終與單文柔情定終身！

陳展鵬入行以來與不少女藝人傳出緋聞，當中包括2008年與亞姐姚嘉雯交往3年﹑2012年與鍾嘉欣因為拍劇而傳戲假情真，期後又與貝安琪﹑龔嘉欣﹑胡定欣傳過緋聞！不過，自從陳展鵬與單文柔的戀情曝光後，兩人愈來愈恩情，最終更情定終身！

幕前工作反而更難出軌？

老公在娛樂圈工作，日常會接觸到不少異性。不過，單文柔覺得老公在幕前工作，反而更難出軌，「尤其是啱啱拍拖個時，佢嘅一舉一動已經有好多人走嚟話畀我聽，而且佢令我真係好安心，好少做啲令我唔舒服嘅嘢，最重要係佢做呢行有好多狗仔隊睇住佢，所以我唔使睇實佢~」

單文柔希望老公像劇中角色一樣浪漫！

兩人在節目中亦分享了交往期間不少甜蜜往事，陳展鵬透露單文柔是「夢幻型」，希望老公能像劇中角色一樣浪漫！陳展鵬憶述︰「情人節最冧嗰次我送咗100枝玫瑰花，佢成日搵我拍劇做過嘅浪漫嘢出嚟（要我對佢做返），但拍戲唔使我出錢架嘛。」

為氹老婆，來回喪跑40多層樓梯拎婚紗？

單文柔又提到陳展鵬為自己做過的另一件窩心事，當年兩人去英國影婚紗相，因為尚未公佈婚訊，要神秘進行~陳展鵬提到上飛機前一日，去拎婚紗時，「部lift壞咗，要行上二十幾樓，又搵唔到人幫手，驚隨時會穿煲！我隔日先覺得攰，我腿軟呀~」

單文柔亦憶述出發到英國影婚紗相時，遇上很多瑣碎的阻滯，「諗住攞唔到婚紗，打算第二日先攞，點知佢話『唔好啦，我上去攞！』我就話廿幾層樓點上去呀？點知佢好快落返嚟，我無特登數，但來回唔使廿分鐘。」可見陳展鵬為了氹老婆開心，不惜來回喪跑四十多層樓梯，為單文柔拎婚紗，難怪事隔幾年，依然令單文柔感到十分窩心~

Text：Girlstyle Editorial
Photo Source：IG@單文柔﹑節目截圖
延伸閱讀：
《鐵拳英雄》唐詩詠與陳展鵬打出愛火花？絕密NG片段公開！陳展鵬爆英文對白頻頻NG

鐵拳英雄丨陳展鵬鄉音出場激似「譚仔姐姐」惹網民失笑！唐詩詠破格演打女，被評無力？