日本AV片封面主題婚禮！新娘現身解畫：「想將來同孫仔孫女講，當年公公追婆婆的時候幾有個性」

結婚係女仔人生中嘅一件大事，好多女仔都想將婚禮做得盡善盡美，令自己成為婚禮上嘅公主～最近有對新人反其道而行，以日本AV片封面作為Pre-Wedding嘅主題，被傳媒封為「最爆Wedding Party」，仲獲得唔少網民大讚添！

事緣有位網民經過酒店，見到隔離Ball Room嘅結婚相放喺當眼處，而呢幅結婚相唔係行唯美浪漫風格，而係超大膽地用日本AV「絕頂・痴漢」為題影咗輯Pre-Wedding！

另一幅海報係以「激婚」為題，用嚟俾賓客簽名用，海報上面仲寫住「結婚就像坐監，無論怎樣！你都一定要站，起，來」新郎仲要露出屁股舉中指，真係好爆！網民睇完呢個Post後迴響非常熱烈，大家對於呢輯Pre-Wedding都有個疑問：「四大長老冇反對咩？」、「老人家見到應該會唔鐘意」

仲有枝回禮禮物，其實只係一枝印著「細佬」嘅天然潤唇膏，新人仲要勁有心思，每位賓客嘅回禮禮物都有自己個名㗎～～唔少網民仲以為真係成人產品（笑）

新娘子亦都現身解畫：「我地的家長都好支持我地有一個有個性的，不一樣的wedding party⋯⋯我們一致通過用癡漢為題，去突顯我先生對我的迷戀。最攪笑，最爆的係我最後講一句- 痴線㗎我哋今日都結婚啦！我地唔係想不文，唔係想低俗，只係想過下戲癮，做一次主角！婚禮上做公主，王子係主流，但我地想貼地d，爆d，以一個大家都估唔到的型像去演繹。想我地班朋友睇完會笑餐飽！幫大家減減壓！想將來我地可以同孫仔孫女講，當年公公追婆婆的時候有幾有個性！」

而網民對於呢個「最爆婚禮」大多數都表示欣賞，仲話「朋友之間都一定好記得哩餐，感覺個2公婆感情都會好好，希望佢地百年好合！」、「可以玩到咁大膽嘅本身感情應該都好好，起碼唔會悶先，咁嘅關係通常先會長久」

人生真係好難得搵到一個肯陪你癲、肯陪你創新嘅另一半，祝呢對新人恩愛到老！！

Text：Girls Editorial

Photo Source：FACEBOOK@Dodos Mak