KC、Terry上演名場面！《愛回家》惡搞《大叔的愛》，根叔的愛大玩Hehe網民勁鐘意！

處境劇《愛回家之開心速遞》一向鐘意向唔同嘅電影／電視劇致敬，今集預告一出即刻引發網民期待，因為劇組今次準備嘅係前排大熱嘅Hehe神劇《大叔的愛》！見到KC同Terry喺浴室錫下額頭都足以令網民暴動啦～～

KC見到Helen同埋John幸幸福福，就開始萌生妒意！Terry一眼就睇穿KC嘅心事，見佢得閒冇嘢做就話想叫KC陪佢排戲～不過呢場戲就係講Terry要幫「師父」抹嘴仔，令到KC覺得勁反感，唔肯幫Terry排戲！

因為KC唔肯幫手，所以Terry唯有四出搵人幫手，結果見到根叔喺度幫博思抹汗，正正就係佢想搵嘅師徒情！排戲嘅時候佢地嘅動作都令網民覺得想入緋緋！！

Terry同根叔排戲，其實根叔係收緊每一個鐘一千蚊嘅報酬，所以根叔先咁順攤叫Terry排完一次又一次～點知傻更更嘅Terry以為根叔真係咁有耐心，仲比KC聽到「比著舅父，佢實話我煩呀！」咁啱比KC聽到當然係嬲到震啦！佢地三個講嘅嘢真係十足十情侶咁，根叔完美代入《大叔的愛》部長嘅角色呀～

見到KC呷醋個樣，唔講真係以為佢地係情侶呀！（大家又點估到根叔同KC會變成情敵關係⋯⋯）

根叔同Terry十指緊扣逃避KC追捕嘅時候，仲要加咗啲朦朧Feel嘅特效，成個感覺真係勁似日劇《大叔的愛》！

原來Terry一直都搞錯劇本入面「師父」嘅性別，但妒忌心超強嘅KC就乜都唔知，為咗爭返Terry返嚟，就唯有趁Terry沖涼嗰陣突襲佢！

劇組真係好貼心，《大叔的愛》入面牧凌太著住紅色間條恤衫強吻春田田，而《愛回家》入面，KC都係著住紅色間條恤衫㗎！呢啲細節位真係令人感受到劇組嘅心思～

仲有網民將部長同根叔拼埋一齊，完全係100%MATCH！

每次《愛回家》將名電影／電視劇惡搞都唔會令人失望，呢集真係又搞笑又帶點痴線嘅感覺，對於有睇《大叔的愛》同埋鐘意BL嘅女生嚟講，今集絕對收貨啦～

Text：Girls Editorial

Photo Source：TVB