「傻婆都可以識煮飯」！麥美恩《美女廚房》大Show廚藝，網民：「娶老婆一定娶呢種！」

《美女廚房》開播以嚟口埤麻麻地，不過嚟到最新一集終於有正評啦！今集有傻大姐麥美恩（Mayanne）、黃智雯同埋菊梓喬（Hana）做嘉賓，驚喜位就落係睇落傻更更嘅Mayanne竟然係廚藝了得、實至名歸嘅美女廚神！

今集三位參賽者之中，只係得菊梓喬唔識煮嘢食，而麥美恩、黃智雯嘅廚藝都有返兩手㗎！第一環節嘅「指定菜式」係蕃茄意大利雲吞，雖然Mayanne啲雲吞望落燶哂，但係嘉賓評語又Ok喎！

張振朗甚至話Mayanne呢個雲吞係近乎呢幾集入面，唯一可以放落口嘅食物！

仲話食完呢個雲吞「要嫁20幾次真係難唔到你」～

Mayanne仲因為太感動而眼濕濕，因為其他寫稿同事都以為佢一定係地獄廚神，但竟然得到嘉賓同評判話有驚喜！

第二環節就係「自選菜式」，無論係煮白鱔定素肉都難唔到Mayanne，首先佢揀食材已經好穩陣地選擇中式嘅薑蔥，仲已經諗好點整，成個煮食過程有板有眼！

一路煮嘢食，一路跳舞搞笑，應該得Mayanne做得咁有喜感！

煮好啲鱔之後再次成功獲得主持同嘉賓力讚～

主持人之一嘅張振朗更加話自己如果90歲都未娶到老婆，就會娶Mayanne！不過Mayanne呢啲咁GFable嘅荀盤又點會冇人要呢～

去到最後，佢就喊哂咁話：「很想幫自己形象平反，因為感覺上我好似入唔到廚房，我好驚嚇親我啲未來奶奶，希望可以令到大家改觀啦，傻婆都可以識煮飯！」

最後Mayanne以101.89分勝出，成為冠軍！Mayanne除咗個樣傻更更，節目上面好玩得之外，今次仲發現原來佢絕對係入得廚房、出得廳堂添～絕對係實至名歸嘅美女廚神，仲有唔少網民大讚：「娶老婆一定要娶好似Mayanne呢種！」

性格爽直、大癲大肺嘅Mayanne可能係某啲人眼中唔算係一等一靚女，但係學網民話齋：「可能佢唔算靚，但長遠來說，娶個開朗幽默、識煮兩味的老婆，會開心過搵女神做老婆囉」

Text：Girls Editorial

Photo Source：TVB