C君公主抱Do姐！《Do姐再Shopping》第四集笑點，Do姐話要摸勻陸永全身？

依加每晚10:30準時坐定定睇《Do姐再Shopping》已經變左每日最期待嘅時刻！因為Do姐同農夫、黃翠如嘅化學反應真係好正！每集都笑料百出笑到肚痛咁濟，Do姐玩得農夫轉數又快，睇佢地互窒互笑半個鐘眨眼就過，而噚晚第四集都好多亮點！

噚晚Do姐同農夫、黃翠如就去左札幌最大嘅魚市場，Do姐想講三文魚子，但突然唔記得咗呢個Term，就話「魚子嘅蛋...魚子蛋？」又話係「三文魚蛋」，C君梗係趁機大笑話：「乜有依樣野食物㗎咩？」

唔認輸嘅Do姐棟係死都話：「叫蛋唔得㗎咩？一定要叫子？」最後當然都係C君投降：「得〜你講咩都得」Do姐真係好可愛（笑）

之後佢地見到好靚嘅雪場蟹，Do姐就話：「拎黎煮麵食就啱，啖啖肉」，陸永即刻勁Shock，話自己煮公仔麵最奢侈都係落急凍蟹柳，果然冇對比就冇傷害！（笑）

然後見到當造嘅平靚正海膽，Do姐就好霸氣咁話：「唔食唔係人！」仲一口氣掃咗十盒番香港！

食完海鮮，佢地就轉去一棟活化舊式住宅，裡面有好多唔同嘅小店，陸永就話想去唱片店睇睇，C君就話見到Records以為係賣紀錄，即刻激到其他人好嬲又好笑暴打咗佢一輪〜

期間，陸永講野時不自覺咁拍Do姐膊頭，Do姐即刻話：「唔好掂我，講就講，拍我膊頭做咩姐！」陸永表示無辜，翠如C君就係側邊大笑〜

而最好笑嘅係，之後Do姐講講下野都捉住陸永手臂，陸永梗係即時反擊，用番同一句說話窒Do姐！

Do姐梗係唔會咁易嚇窒，即刻霸氣咁話：「我可以掂你！我摸你全身都得！」仲一路扮掃落去，陸永只好投降大笑，今次當然都係Do姐 Win。

然後佢地睇黑膠唱片，並發現有香港歌手張露嘅唱片，但陸永就睇錯人地叫「春張露」幫人改花名，Do姐叫佢地道歉！

播住黑膠唱片，悠揚音樂響起令Do姐舞興大發，一時跳起舞黎，C君當然不忙抽一抽「Do姐鈣質舞」水啦！店主見到佢地四個跳舞嘅場面都忍唔住笑咗〜

最後佢地黎到威士忌製作工場，仲由Do姐同C君即席演繹創辦人嘅愛情故事，講到跪地求婚個陣，Do姐就格硬「㩒低」C君要佢跪，仲露出沾沾自喜嘅神情，而陸永做旁白就好抵死咁話：「佢地又攬又錫仲騎牛牛...係冇嘅」但Do姐一個眼神睥過去，就即刻轉口！

更搞笑嘅係，C君仲一手公主抱起Do姐，陸永仲要話：「小心鈣質，正在流失...」睇到真係爆笑咗出黎！

但C君好似抱得有D吃力，放Do姐落地時有D企唔穩，Do姐即刻兇佢：「你跌我落地你就死！」

而陸永更話公主抱依個動作係Do姐要求加落去！

每晚睇佢地真係笑到肚痛，唔知今晚個集又有咩笑料呢？

Text：Girls editorial

Photo Source：TVB